Beleco pura

(Originala titolo: Beleza pura)
Verkis: Caetano Veloso
Traduko: Flávio Fonseca

Ne min logas la mono, ne
Sed belo plura

La mono, ne
Haŭt' klaroskura
La mono, ne
La karno dura
La mono, ne!...

Nigrulino de Kuruzu'
Beleco pura!
Federaci'
Beleco pura!
Rivera Buŝ'
Beleco pura!
La mono, ne!...

Se nigrulino komencas
Ornami la harojn
Ne ordinar'
La plektaĵo similas
La vefton de l' haroj
Konkojn de l' mar'
Ŝi tuj mendas por bele
Surmeti al haroj
Tute kaprica,
Tute delica

Ne min logas la mono, ne
Eleganteco...

Ne min logas la mono, ne
Sed viv' kultura
La mono, ne
Haŭt' klaroskura
La mono, ne
La karno dura
La mono, ne!...

Bela fraŭlo de Badaŭe'
Beleco pura!
Ile'-Aje'
Beleco pura!
La mono, he!
Beleco pura!
La mono, ne!...

Ene de tiu turbano
De Filo de Gandhi
Familiar'
Ĉio estas tre ŝika
Kaj tre bonaranĝa
Tuta la far'!
Fajna pajlo marborda
Plektiĝu senŝanĝe
Ĉiuj la rozoj
Ĉiuj ripozoj...

Ne min logas la mono, ne
Sed la misteroj...


Rimarkoj kaj Kuriozaĵoj:
- Kuruzu', Rivera Buŝ' k Federaci' (originale: Curuzu, Boca do Rio kaj Federação) estas kvartaloj de la urbo Salvadoro, en la ŝtato Bahio.
- Badaŭe' (originale Badauê) estis afoŝeo aktiva inter la jaroj 1978 kaj 1992 en Salvadoro. Afoŝeo, ankaŭ nomata "strata kandombleo", estas karnavala strata irantaro. Temas pri afrik-brazila manifestacio kies radiko apartenas al la iorubaa popolo. Ĝenerale, ĝiaj anoj estis ligataj al kandomblea aŭ umbanda templo. La esploristoj konsentas, ke afoŝeo naskiĝis en Bahio.
- Ile'-Aje' (originale Ilê Aiyê) estas la unua afrik-brazila karnavalgrupo, kaj stariĝis kiel grava kulturaĵo de la Salvadora karnavalo.
- Filoj de Gandhi (originale Filhos de Gandhi, kun la prononco "Ganĝi" - vidu foton) estas la plej granda kaj onidire la plej bela afoŝeo de la Salvadora karnavalo. Ĝi konsistas ekskluzive de viroj kaj inspiriĝas je la principoj de ne-perforto kaj paco de la hinda pacifisto Mahatmo Gandhio. La grupo prezentas la afrik-religian tradicion per la ritmo de agogo (perkutilinstrumento) kaj per iĵeŝaaj kantikoj en iorubaa lingvo. Ili uzas blankajn littukojn kaj bantukojn kiel kostumoj, por simboli la hindajn vestaĵojn.

Vidu kaj elŝutu la muziktekston kun akordoj (x-sistemo).