La plej kaj la malplej

Ĉi-semajne en BRAZILA KOLEKTO aperas la kanto kun la plej facile ludeblaj akordoj, kaj ankaŭ la plej malfacile ludebla komponaĵo.

Kompreneble ĉiuj estas ludindaj, kaj se vi volas praktiki vian ludadon, faru tion en Esperanto! Aŭ, se vi volas perfektigi vian scipovon de Esperanto, faru tion kantante!

La novaĵoj estas:

Faru, verkita de Lenine kaj tradukita de James Rezende Piton. Jen la ĝis nun malplej facila kanto: ĝi uzas 7/4-an takton kaj povakordojn, ĉio klarigita en la akordodosiero.

Kaj la plej facila estas Tuj, tuj, de Roberto Martins, plurfoje registrita tra la jardekoj, de Carmen Miranda ĝis Ney Matogrosso. La traduko estas de Sylla Chaves, kaj ĝi entenas nur du bazajn akordojn.

Krome, du novaj gravaj aŭtoroj debutas en BRAZILA KOLEKTO:

Paulo Coelho, internacie fama libroverkisto kiu kun Raul Seixas verkis la kanton Viva akvo, esperantigita de Afonso Camboim.

Kaj la elstara sambisto Candeia, kiu verkis la kanton Mi renkontos min, famigitan interalie de Cartola. Ĝin tradukis Vitor Mendes.

Fine (sed ne fie) la kanto Ploras mia kor', de Paulo Diniz kaj Odibar, laŭ traduko de Jorge de Oliveira.

Kaj atendu: baldaŭ BRAZILA KOLEKTO lanĉos novan muzikvideon!

Nenhum comentário:

Postar um comentário

Bonvolu lasi vian komenton. Dankon!